經濟轉型令本地工業面對唔少困難。香港工業總會主席鄭文聰（Daniel）七月上任之後就為業界發聲，尋日又趁好朋友、創科局局長楊偉雄新上場，搶閘建議香港要增加工業用地，包括興建新型工廈。香港土地問題嚴重，政府連搵地建屋都難，工業界又想搶地，真係大家鬥爭崩頭。

鄭文聰

Daniel尋日首次以工總主席身份發表研究報告，佢話香港工業面對營商環境變化，尤其近日法國恐襲對接歐洲訂單嘅廠家嚟講，生意步入冰寒期，本地工業又人才斷層，以及缺乏工業用地供應等，都增加香港發展工業嘅難度。佢又提到香港有冇土地係事在人為，好似香港迪士尼樂園塊地都係搵搵吓就搵到，認為大嶼山或郊野公園周邊土地都可以發展。

既然工總咁多建議，撞啱楊偉雄新上場，Daniel笑言成立創科局已經講咗三年，但港人往往將科技同政治撈埋，依家終於搵到對口「親家」表達意見，仲非常認同楊偉雄提出促進再工業化，短期內一定會約對方出嚟傾。

第一手消息請下載on.cc東網iPhone/iPad/Android/Windows Phone Apps