政壇：把握沙士危中機 御藥堂「進化」
○三年沙士係香港人記憶深刻嘅事，尋日由創業板轉到主板上市嘅御藥堂主席陳恩德（Mark）都有沙士情意結，尋日話當年時，直言沙士係危，但往往亦係機，佢哋公司就係把握危機先壯大嘅。
主席陳恩德（右）身後就係佢哋送畀港交所嘅進化「冬蟲草」。
阿Mark話，公司係今年已經八十幾歲嘅爸爸同阿Mark嘅妹妹喺○二年開嘅，當時佢雖然喺同行做，但仲處於學緊嘢嘅階段，並冇返公司幫手，初時公司規模好細，投資幾十萬就開設咗。○三年沙士，初期傳話板藍根可以醫到，好多人問佢哋買板藍根，啲貨去得好快，佢哋要二十四小時搵貨源畀連鎖零售商，忙到要喺公司瞓，最後雖然證實板藍根對付唔到沙士，但佢哋做多咗好多生意，公司規模亦開始壯大。
尋日轉板上市，佢哋送咗個放大好多倍嘅冬蟲草紀念品畀港交所，而當初上創業板時，佢哋就係送蝙蝠蛾科幼蟲、即未完成進化嘅冬蟲草，咁家吓係咪代表「進化完成」﹖
