政壇：恐襲不斷 何苗春暉籲唔使慌
巴黎恐襲震驚世界，尋日又傳嚟非洲亦有恐襲，紐約亦係高危地點，兒童糖尿協會創辦人何苗春暉（Joanna）出席會方嘅慈善籌款活動時，都對恐襲消息有啲不安，因為佢兩個女兒都喺海外，患有糖尿病嘅二十三歲大女喺倫敦工作，而二十一歲細女就喺紐約讀大學。
何苗春暉身後嘅手袋將作慈善拍賣，希望籌得四十萬元善款。
講到歐洲同美國都可能有風險，佢話：「點都會有啲擔心，但人唔可以令自己活喺恐慌之中，你要繼續做你自己嘅嘢。」因此，佢除咗提醒女兒唔好去人多擠迫嘅地方外，並冇過分驚慌，亦冇日日電話，大家繼續各有各忙嘅生活。
拍賣助糖尿病童
講番今次嘅慈善活動，佢哋搵嚟八十個手袋作慈善拍賣，貨品嘅款式有啲係新一季產品，亦有啲屬於上季，善款將會全數捐贈予幫助糖尿病兒童：「新季手袋可以拍得更高價錢，希望籌到四十萬。」
