政壇：搞搞政：拉布禍延財會 陳加強開炮
拉布之風玩謝立法會，尋日財務委員會開會，財經事務及庫務局局長陳家強都忍唔住開炮，批評財委會效率低，開會時間多咗，完成審議嘅項目就下降晒，佢語重心長咁希望議員善用時間。點知話口未完，拉布三子就繼續發功，提出中止待續和休會動議，之後又同財會主席陳健波掀罵戰，搞到陳健波一度激動宣布休會，結果又被指摘。財會咁立立亂，陳家強真係愈睇愈谷氣都似。
呢頭搞拉布，嗰頭審議開設副消防總長職位時，拉布三子又同財委會主席陳健波爆發罵戰！人民力量陳偉業（大舊）質疑陳健波有多重身份，作為保險公司高層得到唔少利益，陳健波忍唔住反駁大舊「多餘」、「撩人者賤」，係人身攻擊佢咁話，跟住激動宣布休會。會計界議員梁繼昌就認為休會唔合理，最後仲嬲到拍枱，表示對陳健波好失望，認真好火！
恐累港珠澳橋停工
陳健波事後話，自己為香港放棄好多嘢，所以對指控好執着。對於罵戰，佢形容只係做番「真正嘅陳健波」，唔能夠當聽唔到歪理。佢話事後收到好多議員紙仔，提醒佢唔好中計，所以佢會鑲起紙仔提醒自己。佢仲話，財委會時間不足，聖誕前只剩三節會議，有機會因為撥款未能通過而令港珠澳大橋工程停工，所以希望議員聚焦有爭議嘅議題。佢仲話聖誕假期後要開全日會議先得，但可行性低，將會相約政黨商討。
