香港係中西薈萃之地，經過百幾年發展，出現唔少傳統老店，留下唔少集體回憶。好似有七十七年歷史嘅沙田龍華酒店咁，係本地碩果僅存嘅園林式酒家，除咗充滿古色古香嘅懷舊風味，其首創嘅燒乳鴿更加遠近馳名，當年李小龍等巨星亦成為座上客，《唐山大兄》甚至喺度取景添。可惜吖，隨着其續牌申請遇到官僚諸多留難，呢間老店瀕臨結業，遲早成為歷史。

係咁嘅，龍華酒店嘅食肆牌照今年六月到期，店方好似以前咁向當局申請續牌，本來以為冇問題喇，點知今次撞正食環署及消防處兩個部門耍太極，左推右推，一時要求提交新防火圖則，一時又話要更新消防裝置或將布局還原番四十年前嘅模樣，搞到店方無所適從，續牌遙遙無期。

有專門幫食肆申請續牌嘅顧問公司話喎，以前續牌唔使問消防處，但去年實施新消防安全措施後，食肆必須搵認可人士攞齊證書畀消防處，食環署至肯受理，究竟係咪矯枉過正，兩睇喇。

冇錯，自從二○○八年旺角嘉禾大廈發生四死五十幾人傷嘅大火後，食環署及消防處訂立相關機制，提高安全準則，食肆必須符合消防安全規定至可以續牌，本來係應有之義，無可厚非，問題係官僚作怪，無事生非，咁又唔同講法喇。好似龍華酒店呢類老店，歷經風雨，多番變遷，當局要求還原到幾十年前嘅布局，根本就係刁難。正如店方質疑，依家邊有幾十年前嘅圖則吖，交新則又唔收，點樣先至可以續到牌呢？

係人都知，家陣經濟不景，加上租金昂貴，老店本來已經唔易經營，當局唔止冇諗辦法改善營商環境，反而落井下石，設置重重關卡，慌死你唔執笠咁，簡直靠害。難怪龍華酒店老闆娘直言心淡，若本月廿六日寬限期屆滿前仲未能成功續牌，惟有關門大吉。

有人話香港缺乏特色旅遊景點，其實唔係，龍華酒店唔止充滿本土特色，而且陪伴唔少港人成長，只不過港產官僚唔識寶，沉香當爛柴之嘛。今時今日，傳統老店執完一間又一間，雍雅山房早已消失，如果連龍華酒店都冇埋，唔止可惜，直頭可悲添吖。

正如古人話齋，此情可待成追憶，只是當時已惘然。香港傳統老店買少見少，市民要發思古之幽情，睇怕只能夠去禮賓府咯，叮！