城中鏡：陳榮聲踢爆「射波」 四主因
睇住前晚港隊逼和中國隊，大家有冇想落場射番球？球場射波未必人人識，睇嚟返工「射波」就可能比較擅長。
為免「射波」，陳榮聲話，中小企團體保險好有發展潛力。
友邦香港及澳門首席執行官陳榮聲尋日公布旗下調查，發現打工仔平均每年請病假三點三日；舊年請過病假嘅，有一成二人認自己曾經「射波」，即係詐病請假。調查話詐病唔返工有四大原因：頭位係家庭問題，佔百分之八；但邊得咁多人有家庭問題，有百分之二人實情係去咗見工，另有百分之二係生日大晒而詐病請假；最估唔到嘅係，竟然有百分之一人係因為塞車遲到，索性唔返！
九成人帶病返工
不過，其實大部分港人都好有責任心嘅，調查又話，近九成人都曾經帶病返工，主要係因為工作太忙、冇時間睇醫生、覺得自己吽吽吓就會好番。係咪講中咗大家嘅心聲呢？
老闆唔想員工「射波」見工有乜計？調查發現，無團體醫療福利嘅打工仔，為見工而「射波」比例係百分之四，相反有團體醫保福利嗰啲就只係得百分之一。老闆們，識做啦？
講開又講，點解詐病偷懶唔返工叫「射波」？有人話係因為同「卸膊」差唔多音；又有人話源於大學簽到簿上，點名方格入面畫個圈代表缺席，方格似龍門，圓圈似個波，講講吓變「射波」喎。
