城中鏡：靚太出道遇家暴
愛沙尼亞共和國駐港名譽領事Matthew林建康做合夥人嘅鄭黃林律師行，同全球排名一百大嘅美國尼克松（Nixon）律師行合併，早前喺中環香港會舉行慶祝酒會，本身係律師嘅Matthew太太Lianne林黃寧艷講起打官司嘅經歷，靚太話最難忘當年打法援官司時嘅驚嚇場面。
林黃寧艷（中）嘅閨蜜林平（左）同鄧宣宏雁齊現身捧場。
胡慧中（圖）出席酒會支持好友林黃寧艷。
趙國雄（圖）捧場之餘，仲同林建康互笠高帽。
林建康（右）同合夥人Andrew Glincher合作愉快。
Lianne啱啱出道時曾經名列法律援助署嘅法援律師名冊，有次佢喺一宗家庭糾紛中代表太太一方，點知喺法庭外，嗰位丈夫竟然衝過嚟打太太，Lianne想拉都拉唔切，自己又好驚，至今諗起都心有餘悸，事關冇諗過打官司都會遇到咁暴力嘅場面。依家佢喺丈夫Matthew嘅律師行工作，主要處理租務案件，確係簡單又安全得多。
當晚到賀嘅政商界人士好多，包括馬會行政總裁應家柏同太太Winnie林平、太子珠寶鐘錶主席鄧鉅明同太太Emily鄧宣宏雁、申訴專員劉燕卿等人。港澳台灣慈善基金會總理胡慧中都有到場，佢係Lianne相識多年嘅好友；而長實集團執行董事趙國雄亦有出席酒會支持Matthew。
鄧宣宏雁久休復出撐老友
Emily早前唔小心滑倒，喺屋企休養咗兩個幾月，今次為咗好友復出，認真有心。講起最近加工肉類被列為第一類致癌物，德國香腸世界聞名，唔知身為德國人嘅應家柏點樣取捨呢？Winnie就好輕鬆話，丈夫鍾意食上海菜喎。
