提款仲講ATM機？好快Out，嚟緊係VTM（視像櫃員機）嘅世界，不論大客細客都有真人即時視像招呼。永隆銀行助理總經理Derek鍾少權預告，永隆年底於旺角分行就有VTM，每部成本唔超過六十萬元，初期可以現金提存、戶口服務同兌換都得，遲啲打算包埋貸款同按揭等服務。聽講唔只永隆，呢排陸續仲有幾間銀行都推VTM，到時銀行又要隔住個「芒」鬥服務。

鍾少權話中區分行翻新後開張咗十個月，營業收入按年升咗一倍。

銀行愈來愈High-Tech，永隆唔止搞VTM，中區分行翻新咗，有Touch Screen桌面電腦設備幫客做財務分析，仲連即時抽獎都做埋，仲有展覽廳展出術數大師蔡伯勵珍藏通勝典籍添。

第一手消息請下載on.cc東網iPhone/iPad/Android/Windows Phone Apps