政壇：創科署長「降格」幫擋駕
幾經波折下，創新科技局將喺聽日成立，轄下將會有創新科技署同政府資訊科技總監辦公室，盛傳出任局長嘅特首創新及科技顧問、行政會議成員Nic楊偉雄尋日同未來下屬、即係創新科技署署長蔡淑嫻一齊出席一個開幕禮。開幕禮未開始前，Nic啱啱同記者打完招呼，蔡淑嫻就「搶閘」為未來上司楊偉雄「擋駕」，急急講明Nic唔做訪問，仲即刻拉走Nic添，唔知嘅仲以為佢係工作人員。
蔡淑嫻（左）同楊偉雄（右）密密斟，唔知係咪匯報緊創科局成立嘅事呢？
政府未公布創科局局長人選，Nic根本同蔡淑嫻並非上司下屬嘅關係，蔡淑嫻搶閘擋駕，似足局長新聞秘書，唔知嘅仲可能誤會佢係大會工作人員添，作為署長做埋呢啲工作，可以話係降格，唔合身份！我哋曾經向創科署查詢蔡淑嫻嘅做法係咪合適，但該署就否認署長有為楊偉雄「擋駕」或代言。
講番Nic喺開幕禮結束後，笑笑口話：「你星期五之後先問我啦！」真係畫公仔畫出腸喎。而佢喺致詞時就提到，早前同特首去以色列交流，當時有位嘉賓提到今次係第四次創業，過去已經失敗咗三次，Nic就用呢個例子說明，要受多次失敗，先能夠創造最終嘅成功。呢個例子都頗似創科局嘅成立過程，睇嚟Nic感受一定好深嘞！
