政壇：趙薇猛敲鑼 身家漲兩億
中國創意尋日上市，趙薇以基礎投資者（Cornerstone Investor）身份出席，佢認購咗五千四百萬股中國創業，佔股權百分之四點五。佢肯親身嚟撐場皆因佢同主席楊劍係相識二十年嘅老友，楊劍請埋趙薇一齊主持上市敲鑼儀式。趙薇立即「小燕子」俏皮上身，敲咗一下之後敲上癮，再大大力敲多幾下。Cornerstone同主席一齊敲鑼已經少見，個鑼一次畀人敲咁多下就更少有。
大鑼敲幾敲，趙薇（左）身家漲兩億，佢老友楊劍亦顯露咗自己嘅語言天分。
趙薇近年轉戰財金界，投資不知幾勁，上次減持阿里影業擸咗十億後，尋日隻中國創意收市價四蚊，比配售價三毫九升咗九倍，趙薇做一做Cornerstone，首日帳面就勁賺兩億。究竟係咪有人畀貼士？趙薇就話冇向馬雲請教過投資意見，仲話投資嘅嘢只問佢老公黃有龍。佢又呻，以前淨係專注做演員，依家做埋投資者又做導演，其實都幾攰喎。
而佢老友楊劍絕對有Artist潛質，事關楊劍語言藝術了得，仲廣東話同普通話不時轉台。大家好奇今次投資有冇預埋趙薇老友馬雲（梗係講緊阿里位壇主）一份？楊主席答「我們都是朋友」，又話馬雲咁嘅成功人士係佢偶像。咁馬化騰（即騰訊位教主）呢？楊主席就答「一個馬就夠啦，你估買馬咩」。
