政壇：搞搞政：新思維度身搞改革
由狄志遠等多名前白鴿黨員組成嘅「新思維」，尋日公布一連串有關地方行政嘅改革建議。當中最矚目係將依家立法會地方選區同區議會選區重新統一劃做八區，仲建議區議會選舉改用多議席單票制，取代單議席單票制。眾所周知，單議席單票制下，向來係建制派或泛民主派大黨嘅天下，而多議席單票制就有利勢孤力弱的少數派，新思維將成為得益者之一，莫非該黨提出嘅改革建議係為自己度身訂造？
新思維建議將十八個區議會減至八個大區議會，每區人數約一百萬人。每個大區議會中，每十萬人口再設一個區議會小選區，每個小選區可設三至五名區議員，以多議席單票制選出。假如每個選區都有五名區議員，即共有四百名區議員，同依家區議員人數差唔多。
該黨仲希望將區議會秘書處獨立，加強支援區議會嘅工作，同時仲希望民政事務專員改名做政務專員，兼採用特首委任制，由區議會主席擔任。
副召集人黃成智話，地方行政改革建議係希望區議員能夠有代表性、排除咗自動當選，同埋避免有政黨以「蛇齋餅糉」等小恩小惠換取選票。成員周奕希又話，依家區議會制度難培育政治人才，改革建議希望當局參照前兩個市政局嘅職權，下放文娛康樂、環境衞生嘅實際權力畀區議會，增強番年輕一代嘅議政能力。
根據該黨嘅改革建議，假如將十八個區議會重新劃為八區，起碼最少要每兩個選區合併做一個選區。但十八區劃區沿用咗幾十年，再重新劃區嘅話，將會係翻天覆地嘅變化，相信單係學校網已惹起好大爭議，實際上可行性不大。再者，下放文娛康樂、環境衞生嘅實際權力畀區議會，等同將前兩個市政局「翻生」，咁係咪走回頭路嘅舊思維呢？
