政壇：橄欖代發叔發聲

泛民主派立法會議員郭榮鏗提出口頭質詢，指香港面對嚴峻嘅土地問題，質問政府有冇計劃減少興建丁屋嘅土地。發展局局長「波波」陳茂波就話政府認同有檢討丁屋政策嘅需要，但興建丁屋需求難以預計，唔係每個擁有丁權嘅原居民都有申請丁屋嘅打算，加上丁屋問題牽連甚廣，涉及歷史、法律、環境、土地需求等複雜問題，需要仔細檢視及研究至得，但政府會持開放態度，無既定立場去處理丁屋問題。

新民黨嘅葉劉淑儀重提早前有官員講過，二○二九年就唔再執行丁權，又有議員重提新界鄉議局○七年提出興建高樓嘅方案，畀每個有丁權嘅原居民分配單位去解決丁屋問題，而紡織及製衣界議員鍾國斌都話原居民唔介意向高空發展，點解政府唔肯做。波波就話鄉議局同當局對高樓嘅層數、喺咪全數單位滿足原居民等都未有共識，而且除咗原居民利益，都要平衡整體社會需要，所以未考慮有關方案。

稱受《基本法》保障

唔好以為無咗發叔在場，議會就無人幫原居民，橄欖就代為出頭。佢話原居民丁權受《基本法》保障，唔應該將丁權同大眾住屋需要造成對立，更毋須因此剝削原居民。橄欖咁關心丁權，幫發叔維護原居民利益，因為佢住喺十二笏村十幾年，老婆係原居民，而外父仲做過村長，作為既得利益者，當然要發聲啦！

估唔到議會缺少咗發叔，仲有橄欖為原居民着想，但波波都話目前最急切需要係覓地，丁權只係次要工作，非急需處理嘅問題，依家未有時間表去處理，目前只會用管控手段去控制丁屋發展，無地就唔批准建屋。據了解，原居民一直最關注無地建屋，而且積壓大量丁屋申請個案未處理，依家泛民議員仲話要減少興建丁屋土地，豈不是同鄉事派對着幹？