有人講過，文革名義上早就成為歷史，實際上依然存在。真係講得冇錯o架，好似香港咁吖，成個社會陷於政治狂熱，家嘈屋閉，永無寧日，同文革冇乜分別嘅咋。

嗱，睇大學就知喇。嶺南大學繼早前上演學生圍堵及衝擊校董會鬧劇後，尋日又有一班學生趁舉行畢業禮發動突襲示威，喺場內又放紙飛機，又擺白花，話要抗議新校董任命同哀悼嶺大喎。面對咁嘅亂象，校長都冇晒符，話學校尊重學生表達意見嘅權利，亦重視明辨及慎思，期望任何人作批評前應有理據，並重視不同意見人士咁話。

冇錯嘞，學生固然有表達意見嘅自由，但都要識得尊重其他人，畢業禮係莊嚴嘅場合，點可以淪為政治舞台o架。尤其係擺白花，搞得好似喪禮咁，有無考慮過其他老師及學生嘅感受呢？正所謂，敬人者人恒敬之，唔識尊重自己嘅人亦唔會得到其他人嘅尊重。大學生尚且唔知尊重為何物，所謂民主及自由又從何談起呢？

即係咁，隨着校園愈來愈政治化，大學畢業禮淪為政治舞台，都見怪不怪咯，幾乎間間大學都係咁，簡直無奇不有，亂象叢生。冇計喇，校園政治化，院校之間有樣學樣，一間比一間激進，一間比一間出位，唔七國咁亂至奇吖。唔少大學生甚至將香港隊對中國隊嘅足球賽政治化，你話係咪走火入魔吖？

當年內地文革就係由學校開始，唔止搞到教育陷於癱瘓，成個中國都幾乎萬劫不復，呢頁慘痛歷史教訓，香港學生就算冇讀過都應該聽過，點解仲要咁搞呢？講到尾，本港大學近年嘅國際排名跌跌不休，部分教職員不務正業，固然難辭其咎，而部分學生有書唔讀，一味搞政治，亦有不可推卸嘅責任。各位大學生，為人為己，都係專心學業，還校園一個寧靜環境喇。

講起都覺得悲哀，今時今日唔止校園政治化，連一場世界盃外圍賽都搞到滿城風雨，如臨大敵，警方連衝鋒車都出動埋，唔知嘅仲以為暴動添。香港人一向和平理性，就算喺足運最巔峰嘅八十年代，球迷都識得守規矩，唔會做出挑釁嘅舉動，今日港足水準插水，反而政治化愈演愈烈，打波變嗌交，球場變戰場，唔知好嬲定好笑。

講到底，一個地方嘅沉淪唔係冇原因，香港嘅政治狂潮究竟幾時至會消失呢？