城中鏡：「酒甜似老婆」
皇室釀製嘅美酒，平民實在難有機會享用，格魯吉亞皇室出售皇室御釀葡萄酒與平民共享，實在難得，王子Juan Bagration Mukhraneli（王子）日前仲專程到訪香港，為「格魯吉亞美酒節二○一五」作路演宣傳。今次係王子首次訪港，會喺香港停留十日再轉訪北京，佢已諗好要食盡香港同體驗香港文化，仲話要拜會以前讀書認識、多年無見嘅朋友。佢又打算四圍觀光，但因啱啱到埗未知邊度值得去，仲反問記者有乜好提議添！
格魯吉亞王子展示該國皇室人員喺重要場合所用嘅牛角酒杯。
葉澍堃從未享用過皇室酒，盛讚同平時飲開嘅大有不同。
格國王子路演宣傳
來港路演宣傳嘅王子透露，格魯吉亞人已當飲酒係生活一部分，係當地一大文化特色，大部分家庭仲會自行釀酒，所以每家每戶都可算有其獨門釀酒秘方。佢仲話格魯吉亞嘅釀酒技術已有逾八千年歷史，現時只有摘葡萄會用機器，其餘釀酒工序仍採用傳統方法。難怪成為非物質文化遺產喇！
前經濟發展及勞工局局長葉澍堃亦獲邀試飲御釀葡萄酒，佢笑稱坐喺王子隔籬，已覺得自己似王子。之後試飲半甜酒時，又話隻酒甜在心頭，令佢諗起太太，認真識把握機會氹老婆。酒評家梁淑意舊年專誠去格魯吉亞參觀當地酒莊，認為當地酒口味特別，有部分酒能夠配合中菜，確係一個新嘗試。
今次推出三款御釀葡萄酒，每款限量四千瓶，仲附有王子親筆簽署嘅號碼證書添！香港係全球首個發售城市，王子話香港係酒類產品重要市場，所以就揀香港打響頭炮。
