話說新界鄉議局喺舊年初撥款一百萬元成立研究中心，據了解，過去二十個月已耗盡二百多萬元經費，於是喺尋日嘅鄉議局執委會上，提出一項追加一百萬元撥款嘅臨時動議。會上有執委要求中心清楚交代帳目，連平日作風低調嘅副主席張學明都明言花錢做出嚟嘅研究要言之有物，又反問係咪將平日嘅會議紀錄「搬上去」就可成書，言論惹怒前主席劉皇發妹夫兼研究中心主任薛浩然，雙方一度舌戰「駁火」！

薛浩然認為張學明嘅講法侮辱咗做學問嘅人，又舉例話今年初出版嘅《劉皇發言論集》，係後世研究新界史不可或缺嘅部分，而唔係為咗「擦老細鞋」。之後佢愈講愈勞氣，話「唔鍾意咪炒咗佢唔做，慳番啲錢」，又批評對方唔聽意見。張學明回應時話，如果薛係以中心主任嘅身份喺執委會上表達意見，佢唔會聽；又指無清楚指示中心工作，係佢作為「老細」嘅責任，說話之中三次強調自己係「老細」身份。

張學明續指鄉議局撥出三百萬元，研究中心喺年半以嚟出版六本書，內容以寫實、紀要居多，佢從旁聽到好多想法，認為探討小型屋宇政策先係重中之重。雖然佢多次強調唔係指薛浩然辦事不力，只係希望大家清楚研究中心點樣使用經費，但言下之意好明顯係指研究中心使錢物非所值，而出版嘅書籍同報告唔係太實用。

劉業強沉默 籲平心靜氣

薛浩然同張學明單喺呢個議題上已爭拗咗幾分鐘，後來錦田鄉事委員會主席鄧賀年都加入戰團，建議研究中心多寫一啲對鄉議局有利嘅議題，例如郊野公園同綠化地帶等研究，又認同執委對研究中心嘅指示應該清楚啲。反觀主席劉業強喺台上一直無出聲，直至臨尾先叫大家提出意見時應該保持平心靜氣。如果身在醫院留醫嘅發叔得知此事，唔知會有乜嘢感受呢？

第一手消息請下載on.cc東網iPhone/iPad/Android/Windows Phone Apps