政壇：施禮賢 愈升職「粵」難學
高力國際今年九月委任咗施禮賢（Nigel Smith）做佢哋香港常務董事，咪睇呢位高力新「香港一哥」係洋人，佢其實好熟香港，事關佢呢二十五年嚟一直喺香港做嘢，先後做過兩間跨國物業機構。但喺呢度生活咗咁耐，點解佢都冇學廣東話？咪又係「春天不是讀書天」囉！
施禮賢（Nigel Smith）
施禮賢中文識聽少少，但講就……佢話至叻同講得最多係「的士」兩個字，事關個音同英文差無幾。收到風，聽講佢講「好麻煩」呢幾隻字，都講得幾精靈㗎！點解咁多年都唔搵機會認真學廣東話？佢話九一年嚟香港後，第二年就撞正鄧小平南巡，過幾年又到九七金融風暴，呢啲影響行業嘅大事一件接一件，好忙囉。佢又話廣東話好難學、語速又好快……佢依家升埋職，仲忙，就更加難學喇。咁仲唔係「春天不是讀書天，夏日炎炎正好眠」！
