政壇：創科局頭炮撼財會
幾經波折嘅創新及科技局將喺後日成立，但未立局就已問定立法會財務委員會攞錢嘞！話說商務及經濟發展局向財委會提交文件，要求財委會向創新及科技基金撥款六億七千萬元，以繼續營運基金轄下嘅四所研發中心。而創新科技署喺創科局成立之後，就會脫離商經局，改為隸屬創科局。財委會已應政府要求喺後日加開會議審議撥款申請，到時新上任嘅創科局局長分分鐘要親自上陣。
下周五加會應急
外界一直傳楊偉雄係創科局局長嘅熱門人選，但政府到依家都未有公布，但未見其人就先見撥款申請。商經局尋日向財委會提交文件，指創新科技署署長建議喺創新科技基金額外撥出六億七千七百六十萬元，支持基金轄下嘅納米及先進材料研發院、香港紡織及成衣研發中心、汽車零部件研發中心，以及物流及供應鏈管理應用技術研發中心的營運期延長，即係由一七年三月營運期結束後再延長四年至二○二一年。
呢項撥款申請可以話係創科局頭炮工作，相信當局會好着緊。不過，財委會因為早前激進派議員就政府成立創科局而「拉布」，已積壓咗唔少議程。而近日立法會工務小組委員會又通過將觀塘駿業街遊樂場活化為觀塘工業文化公園，政府已就有關項目要求財委會主席陳健波喺後日嘅財委會會議後加開多一節會議。陳健波唔止應政府要求後日加會，仲決定喺下周五加開「應急會議」添！
不過，財委會要先處理工業文化公園嘅撥款申請，同埋人事編制小組委員會通過咗嘅多個政府部門開設職位申請，之後先輪到審議創科局有關四個研發中心嘅撥款，莫非創科局局長新官上任要到立法會先「罰坐」，跟住先同拉布議員開戰？
