法國巴黎「黑色星期五」恐襲，死傷枕藉，震驚全球。呢幾日大家掛喺嘴唇邊嘅都係呢一句︰我們都是巴黎人。

冇錯嘞，呢句說話除咗表達對死難者嘅哀悼，亦反映恐怖威脅面前人人平等。天下再無淨土，香港當然唔例外。係人都知，本港作為一個開放型國際都會，不嬲守衞鬆散，恐怖分子取易不取難，搵香港埋手，製造轟動效應，一啲都唔出奇。仲有吖，今次巴黎恐襲據講有槍手係登記難民，香港對假難民中門大開，無任歡迎，萬一有恐怖分子混入其中，後果不堪設想！

正如古人話齋，禍不入慎家之門，點樣小心都不為過。警方以未有具體情報顯示本港成為恐襲目標，將威脅維持中等水平，似乎老定咗啲喎。講真，等到有具體情報至嚟做嘢，蚊都瞓蛇都死喇！

其實唔使講咁遠，淨係聽日喺旺角大球場上演嘅世界盃外圍賽港中大戰，就已經有一定風險。先唔講呢場賽事關乎兩隊出線資格，兩隊只能活一隊，班激進分子話唔定會借機搞事，煽動兩地矛盾，分分鐘又搞到六國大封相。球場人頭湧湧，大家焗埋一齊作困獸鬥，出起事上嚟，隨時觸發人踩人慘劇。有辦你睇，巴黎恐襲暴徒其中一個目標，咪就係法國對德國嘅足球賽事囉。

咁就唔怪得有關方面如臨大敵喇。足總除咗安排兩地球迷分開門口入場，仲要搜查隨身物品同身份證明文件，連劃位都實行「楚河漢界」，雙方隔住一行座位，洗手間亦要分開嚟用，務求令兩地球迷零接觸。警方更加係嚴陣以待，派遣千多人戒備，又呼籲無買飛嘅人士唔好喺球場附近流連。又難怪嘅，風頭火勢吖嘛，梗係小心駛得萬年船嘞。

諗落都幾諷刺，班恐怖分子就話為咗所謂主義同理想打生打死啫，家陣只係踢場波，唔使搞到好似打仗咁啩。有道是，本是同根生，相煎何太急，兩地民眾冇乜深仇大恨，一味嘈喧巴閉，仲有冇再無聊啲吖。上次球迷噓國歌、掟水樽已經累到香港足總被罰款㗎喇，今次繼續搞事，容乜易取消埋港隊比賽資格㗎。所以話，撐港隊還撐港隊，唔該撐得文明理性啲，否則，盞愛佢變成害佢嘅咋。

點講都好喇，政治歸政治，體育歸體育。入場睇波，都係想欣賞悅目嘅賽事，又何必無事生非，添煩添亂吖，你哋話係咪？叮！