政壇：肥亨紐約搵工 流下第一滴淚
依家好多年輕人都埋怨向上游嘅機會好少，商務及經濟發展局前局長「肥亨」馬時亨尋日出席金融發展局就業資訊日，同年輕人分享自己喺金融界嘅工作經驗。佢話當年第一次見工，面試官考佢唔熟嘅會計知識，最後佢誠實話唔識，但最後都過關。之後佢又分享當年外派去美國紐約工作嘅經歷，曾因唔捨得香港家人而猶豫過，仲自爆人生第一次喊就係喺美國工作嘅時候。
馬時亨分享當年獨自赴美工作倍感孤單，仲因工作壓力大而喊過。
肥亨話當年佢主修經濟同歷史，所以唔識面試官所問嘅會計知識，除咗坦白話自己唔識，仲作古仔扮識。好彩面試官都接受佢嘅古仔，仲讚佢誠實添！呢個經歷令佢明白到，唔一定要搵番自己修讀科目嘅相關工作，而要多嘗試，佢仲叫年輕人要誠實面對僱主。
當年資訊科技無依家咁發達，通訊都唔係咁方便，肥亨坦言，就算有乜嘢工作上唔開心都唔可以即時同家人講，所以當年都有猶豫過去唔去美國做嘢。不過，佢之後諗番，雖然獨自出外工作會倍感孤單，又因工作壓力大而喊過，但覺得對自己有幫助，所以鼓勵在場年輕人唔好怕，要珍惜外派工作機會。
