政壇：黃偉鴻賣零食 創意取勝
香港人好鍾意食零食，即使零售市道欠佳，仍有大把人投資零食店。家族做食品生意嘅中華廠商聯合會食品製造業委員會主席Ellis黃偉鴻亦唔例外。Ellis嘅爸爸原本做食品貿易，佢接班後就自創EDO品牌，靠觸覺同創意將生意愈做愈大。
黃偉鴻將家族食品生意愈做愈大。
Ellis話好似早前喺韓國瘋賣嘅蜜糖牛油薯片，一般人未試過味道都好難想像甜嘅薯片點會好食，但係市場瘋搶必有原因，所以佢都唔執輸，早前推出自家品牌蜜糖牛油薯片，結果真係好好賣。
佢又話唔同地方嘅人對零食口味要求亦唔同。最近佢喺內地推出味道麻麻辣辣嘅酸菜餅，採用四川聞名嘅老壇酸菜，推出以來反應唔錯，但係香港人就未必受落嘞！明年一月下旬，廠商會展覽服務公司將到台北舉行台灣工展會，佢一早報定名，以打響自家品牌。
