先後有多名立法會議員表明唔再參選，包括公文袋黨魁「袋巾傑」梁家傑都多次表示唔再參選，有意交棒畀年輕人，令政界中人都關注佢究竟真退定假退。但袋巾傑尋日喺電台節目主動提到，大家好關心「例如」佢明年唔參選，之後會做乜嘢；之後又吞吞吐吐話：「我……如果真係……我嘅主觀願望係可以達成呢，如果我退咗落嚟呢，我諗我可以喺公民社會做多啲嘢嘅。」經常左一句「例如」，右一句「如果」，到底係口頭禪吖，定係留空間畀自己必要時轉身呢？

不過，做戲做全套，袋巾傑講到「如果」退落嚟，就可以「打游擊」做自己想做嘅事，去團體或組織「講吓嘢、交流吓」，又大呻留喺立法會開會好困身，「沒完沒了」，莫非佢留喺立法會唔係佢想做嘅事？點解選完又選呢？

可能「人到唔選膽自大」，袋巾傑講起行政立法關係時，就即時變身局外人。佢話有次同市民交談，對方當咗立法會同特首CY梁振英喺阿爸或阿媽，兩公婆經常嗌交，又指政務司司長林鄭月娥最近成個「打女格」。袋巾傑就教嗰個市民，指父母嗌交，你做仔女當然唔會喺兩父母嗌到「㷫合合」時，伸個頭出來指阿爸或阿媽不是，應該喺適當時候向父母講，呢件事能否一人行一步。

聽完袋巾傑咁講，真係好可笑，好似講到行政立法關係差事不關己，其實佢作為泛民主派一員，可說係有份破壞行政立法關係，如果佢遇到爭拗時可以理性抽身，唔「火上加油」，行政立法關係會差到咁嘅田地？

第一手消息請下載on.cc東網iPhone/iPad/Android/Windows Phone Apps