政壇：吳得掂「芸」遊太虛
呢排因為全港性系統評估（TSA）嘅問題引起全城關注，早前立法會教育事務委員會本月底舉行TSA公聽會，教育局局長「吳得掂」吳克儉竟以「私人理由」缺席，唔止令好多家長得唔到TSA廢存嘅答案，仲激到該委員會主席林大輝紮紮跳添！不過，貴人事忙嘅吳得掂近日竟然撥冗出席立法會議員Ann蔣麗芸嘅網上清談節目，節目上完全無提到有關TSA嘅意見，只係分享自己童年嘅送米經歷。
吳得掂喺節目上大談生涯規劃同職業教育，仲分享童年送米嘅經歷。佢指生涯規劃教育對學生好重要，現時學校會為高中學生尋求實習機會，畀同學及早認清自己日後嘅發展方向。談到參與實習，吳得掂自爆初中時學過送米，要抬一袋三十至四十斤嘅米，送貨經驗令佢體格變好，同時知道耕耘先有收穫嘅道理。莫非吳得掂因為唔想日後擔擔抬抬，先至發憤讀書，最後以「九條尾」即九科每科C以上嘅成績考入中大？
阿Ann暗幫全程避談
傾到大專教育，吳得掂話大學學位有限，平均只有一成八至兩成考生可入讀大學，建議學生好似外國人咁考慮職業教育。佢話十幾年前香港人成日話「工字不出頭」，但時移世易，今時今日好多行業好似化妝師、動畫同時裝設計等都被視為專科專業，更獲政府資歷架構認可，同樣可以喺社會有好大影響力，其實行行可以出狀元。
作為主持嘅阿Ann全程都無主動提及極具爭議嘅TSA問題，明顯係想幫吳得掂一把，以免佢講多錯多啦！不過，擔擔抬抬都要識得「轉膊」，但睇唔到吳得掂當年學送米有學到「轉膊」，否則掌管教育政策唔會一味用死力，兼夾「卸膊」添，認真吳得掂！
