爛船亦有三斤釘，香港大型基建近年多災多難，延誤及超支醜聞不絕，不過都唔係完全乏善足陳嘅。嗱，港珠澳大橋近日揚威國際，為港爭光，都算係難得嘅喜訊咯。

係咁嘅，英國傳媒選出即將竣工嘅「現代世界七大奇迹」，港珠澳大橋榮登榜上，同北京大興機場、沙特阿拉伯吉達王國塔、烏克蘭切爾諾貝爾核反應堆石棺、英國倫敦中部橫貫鐵路等世界級工程齊名。正所謂，有麝自然香。港珠澳大橋唔係浪得虛名o架，大橋全長五十公里，沿途遍布人工島，落成後將會打破中國膠州灣大橋所保持嘅紀錄，成為全球最長跨海大橋，你都咪話唔威水。世界好多大城市都擁有歷史名橋，好似美國金門大橋同英國倫敦塔橋咁，全部都名滿寰宇，如果港珠澳大橋亦成為地標式建築，話唔定有助提升香港形象添。

之不過咁，理想歸理想，現實歸現實。港珠澳大橋受到國際青睞，固然係好事，問題係大橋命途多舛，萬一虎頭蛇尾，咪隨時揚名中外變臭名遠揚？唔係嚇你o架，大橋港方工程一波三折，阻滯多多，一旦完工無期，全球最長跨海大橋做唔成，反而變咗全球施工最長跨海大橋，咁就丟架咯。

同一條大橋，香港同內地嘅進度簡直天淵之別。呢，內地方面又傳來新進展嘞，近日成功克服海底隧道嘅技術難關，順利安裝第二十二節沉管，經近五年施工，目前已經建成三千八百多米隧道，完成三分之二沉管工程，通車有望。反觀香港，工程進度好似拉牛上樹，又被環評官司狙擊，又發生奪命工業意外，最近仲爆出口岸人工島移位醜聞添，搞到一阻再阻，一延再延。難怪有人慨嘆，以香港牛步蝸行嘅效率，大橋能夠如期通車就真係奇迹嘞！

講起真係令人唏噓，當年提出興建港珠澳大橋，目的係打通三地關卡脈絡，提高人流同物流效益，推動三地經濟發展，點知由於香港議而不決，決而不行，搞到大橋崎嶇坎坷，簡直佗衰家。據粗略估計，大橋延誤一年開通，本港淨係路費收入已經損失二十億元，如果以整體經濟角度，長遠計算更加損失高達二千億元，你都咪話唔緊要。

港珠澳大橋係咪創奇迹，好難講嘅。好心港府睇緊啲工程喇，萬一港珠澳大橋出現「斷橋」奇景，實打入「現代世界七大醜聞」添吖，叮！