政壇：特首 fb朋友大輝好關心
話說特首CY梁振英早前學識用社交網站facebook（fb），但嚴格審查朋友名單，只准朋友留言。立法會議員林大輝尋日就特登提出口頭質詢，質疑CY個fb限制多多，包括立法會同區議會在內嘅政界人都唔能夠全部成為CY嘅fb朋友，擔心做法會影響行政立法關係，窒礙團結社會各界，未能建造「香港營」，又問fb對特首選舉有何幫助？大輝咁關心特首fb同特首選舉，唔知背後有乜嘢原因呢？
林大輝同泛民議員一樣對做特首fb朋友好有興趣。（資料圖片）
除咗大輝，泛民主派議員都好緊張點做CY嘅fb朋友，工黨李卓人建議CY向女兒齊昕學習，更應該少講種花同養狗，多提立法會議員。議員郭家麒就建議CY向財爺「鬍鬚曾」曾俊華呢個「鍵盤戰士」學習，更反問「個個做唔到朋友點連任」？民政事務局局長劉江華就解釋，政府會不拘一格與公眾溝通，現正在探索社交媒體，會邊用邊學。佢又話fb係運用現有資源，由行政長官辦公室負責管理同更新。
