政壇：搞搞政：立會玩認真 美食車考察翻生
財爺鬍鬚曾今年財政預算案一提出考慮引入外國美食車建議，十畫都未有一撇，立法會食物安全及環境衞生事務委員會已急不及待，計劃今年九月去美國考察美食車運作，只係當時一班議員反應冷淡，仲被當地機構冷待，最終因為有成員退團而「甩轆」取消行程。
委員會主席張宇人尋日透露考察團將會捲土重來，佢話之前係因為時間正值臨近區議會選舉，各黨派都要密鑼緊鼓籌備，以及當地機構未能接待先至暫緩行程。不過，委員會係贊成考察團建議，所以會繼續進行，秘書處亦正幫手籌備。佢初步計劃考察團會喺明年三月或冇立會大會嘅日子出發，只去三藩市，預料四至五日就足夠，依家已有四、五個議員話有興趣隨團，當中包括委員會副主席嘅漁農界議員何俊賢。
不過，上次已有泛民議員質疑美食車計劃十畫都未有一撇，而且只考察美食車係浪費公帑同時間。張宇人就話行程會一併考察當地如何處理食物安全同食水安全問題，其中一個行程就會去當地碼頭參觀，考察運送同處理食物嘅情況。對於上次原本打算參觀食品及藥物管理局（FDA）嘅實驗室，但FDA就無暇接待，佢話上次係因為當地有會議舉行，秘書處正與FDA聯絡，FDA有意派員到三藩市同佢哋見面。
鬍鬚曾蘇錦樑懶懶閒
張宇人又話今次唔會邀請政府官員同行，事關鬍鬚曾同商經局局長蘇錦樑都已去過外國考察美食車，預料佢哋唔會同行，但委員會都會邀請其他官員有冇興趣隨團。
其實鬍鬚曾將美食車一事交給蘇錦樑負責後，已鮮有提及美食車建議，而蘇錦樑接到工作後亦歎慢板，睇嚟建議都係鬍鬚曾「隨口噏」居多，反而立會玩認真去考察，真係「皇帝唔急太監急」嘞！
