政壇：建仔樹根化 新社聯變社民聯
各個政黨宣傳單張印錯嘢時有發生，但建制派大黨建仔就較為頻密，以致被網民改圖惡搞及嘲笑。該黨立法會議員鍾樹根派發嘅宣傳單張日前被網民發現將英文名「Chris」寫錯成「Chirs」後，該黨作事後檢討，發現原來事件只是冰山一角，除咗有多名區議會選舉候選人嘅傳單出錯外，最離譜係將新社聯與激進民主派社民連「合併」為「社民聯」。莫非製作公司想拉攏兩個政團，促進社會和諧？
網民日前發現樹根派發嘅宣傳單張當中其英文名「Chris」被寫成「Chirs」，仲要喺三、四千張傳單全數派發之後先至發現，事後樹根就解釋係製作公司印刷出錯，同事已經盡力補救。
原來建仔早前聘請多間製作公司為該黨百幾名區議會選舉候選人印刷宣傳單張，但係就發現當中唔少黨員嘅傳單都出現錯誤。其中由於部分黨員同時身兼新界社團聯會成員，故此傳單當中會同時印有建仔同「新社聯」嘅字樣。
不過，建仔接收傳單樣辦後，就有人發現「新社聯」被誤寫作「社民聯」，好彩有關傳單並未流出及向市民派發，如果唔係就可能會好似樹根咁，畀網民擺上網「開心Share（分享）」嘞！
料涉事公司有壓力出錯
對於宣傳品連環出錯，建仔就坦言的確係收到唔少黨員反映，又話佢哋每一屆選舉後都會就宣傳品進行檢討，以及評估所聘用嘅製作公司水平。今次涉事嘅公司過往亦曾聘用，估計係因為要處理百幾人嘅宣傳品而有壓力，先至會出錯。不過，建仔強調呢啲錯誤係不能接受，佢哋會聽取黨友意見後再作檢討。樹根參選區議會選舉漁灣選區，同區候選人有報稱係小企業經營者嘅徐子見。
