天降銹鐵 險殺七人車司機
【本報訊】 車Cam直擊天降鐵片，七人車車主險被插中。80後男子前晚駕駛七人車停在尖沙咀路旁等候友人，停車不足一分鐘，突有一塊生銹鐵片由大廈墮下，擊中車身及車頭冚，差半呎將他插中，他經歷生死一線，形容「險過剃頭」。
車Cam拍下鐵片（箭嘴示）擊中車身一剎那。（讀者提供）
鐵片墮下毀七人車，車主（左）險被插中。
由高處跌下的鐵片。
車Cam直擊實況
險死車主姓陳（二十八歲），前晚十一時許，相約友人見面，駕駛掛中港車牌的七人車，駛至加拿分道二十二號一幢大廈對開停下等候友人到來。他見尚有時間，坐在司機位等候，豈料不足一分鐘後，一塊約三呎乘半呎、重約兩磅的生銹鐵片，突從高處墮下，擊中右邊車身及車頭冚，再反彈落地，擊向右前輪轆軨，他大吃一驚，立即報警。
警員到場登上大廈調查，翻看車上安裝的車Cam錄影片段，拍攝到鐵片擊中車身的一剎那，列作高空墮物致車輛損毀，但未能尋出鐵片來源。嚇破膽的陳稱：「如果跌歪啲，就會插到我﹗」被問及毀車破財感受時，他激動地說：「先唔好理我損失咗咩，你咁樣跌落嚟，萬一係人嘅話，咁點算？呢條街人來人往，架車反而唔係重點，你咁樣跌落嚟，仲要係生銹！」
