正所謂，物必先腐而後蟲生。立法會烏煙瘴氣，藏污納垢，難怪有人稱之為垃圾會，真係一啲都冇講錯o架。

嗱，壹傳媒集團老闆淫賤黎向泛民政黨及人士秘密捐款逾四千萬元，其中五名收錢嘅立法會議員涉嫌從未申報利益，立法會裝模作樣查咗成年，結果公民黨梁家傑同毛孟靜、民主黨涂謹申齊齊被放生，只有工黨李卓人及社民連梁國雄被立案調查，最後又係不了了之。立法會公然包庇牛鬼蛇神，唔止搞到天怒人怨，簡直係侮辱市民智慧。

最離譜嘅係，立法會議員個人利益監察委員會日前召開閉門會議，一錘定音維持「放生」決定。換句話講，呢場「捉放曹」爛騷，喺一片噓聲中告一段落，而五名涉及黑金醜聞嘅泛民議員終於成功甩難，仲唔開香檳慶祝咩。

係人都知，淫賤黎出晒名反中亂港，唔係屈佢o架，佢自己都話「細佬唔係省油嘅燈」，即使受盤問時扮失憶，作供多次以「唔清楚」、「唔知道」回應，但市民心清眼亮無失憶，記得佢承認過有關捐款係用於選舉用途啦，證據確鑿，可謂水洗都唔清，究竟仲有乜嘢好查？

至於無良政客咯喎，更加係有錢使得鬼推磨啦。唔好睇佢哋平日滿口仁義道德，好似好道貌岸然咁款，實際上大把唔見得光嘅嘢。好似話李卓人咁吖，曾將政治黑金「袋住先」長達大半年，唔係受人錢財替人消災，講都冇人信啦。

鬼咩，三歲小朋友都知，立法會呢啲所謂閉門會議，邊會係明鏡高懸公正調查吖，根本係走過場敷衍市民嘅啫，認真你就輸了。

老實講，只要睇吓議監會嘅組成，完全係得啖笑。嗱，參與表決嘅議員，三個屬建制，三個屬泛民，眾所周知，泛民政客一向政黨利益凌駕公義，只問立場，不問是非，官員犯錯就咬住不放，個個義正詞嚴牙斬斬，但一講到查自己友就即刻放軟手腳，呢啲咪叫雙重標準囉。正如西諺話齋，火雞唔會投票過聖誕節，喺議議相護呢個大前提下，泛民政客唔投反對票至奇喇。

冇辦法啦，查實立法會護短玩放生，查案變包庇，早已經唔係乜嘢新聞。計太一叮話齋，旨意議員自己查自己盞嘥氣，惟有寄望廉政公署能夠公正調查黑金事件，揮舞反腐利劍清除牛鬼蛇神，還社會一個公道。叮！