前無綫主播方健儀尋日出席一個公開活動，接受訪問時聲音沙啞，佢解釋：「我感冒咗個幾星期，上星期畀人傳染，喉嚨痛、發燒同咳，咳完就變聲，我寧願發燒都唔想變聲，我靠把聲搵食，今晚仲有司儀工作，我已經飲咗鹹柑桔。我連電台都開唔到咪，有幾日頂硬上，但有次做到一半，拍檔叫我走先，因為開唔到聲，亦唔想虐待觀眾。」

方健儀

另外，有指已婚嘅無綫新聞主播吳璟儁搭上前主播藍可盈，方健儀坦言no comment，話係對方嘅私生活，唔了解，亦唔評論。你相唔相信？佢話：「係前同事私生活，唔方便說三道四，希望大家高抬貴手，唔好影響到我同前同事嘅感情。」覺唔覺會影響主播形象？佢話：「我都唔知，工作上最重要係工作暢順，其他事我唔會理亦都理唔到。」

第一手消息請下載on.cc東網iPhone/iPad/Android/Windows Phone Apps