城中鏡：粵劇糾懶音

講起說話懶音，蔡少森話就算讀書時老師都未必個個執得咁正，好似「滿載而歸」個「載」字讀「再」音，而當「載」字同時間有關聯時，例如「千載難逢」，個「載」字先會讀「宰」音，但佢發現身邊好多人都讀得唔啱。佢又話港人平日生活節奏急促壓力大，所以佢鍾意將說話速度減慢，可以邊講邊諗，當係抖吓氣喎。

仁愛堂主席史顏景蓮話，觀賞粵劇可以豐富長者生活興趣同擴闊社交圈子，畀長者有多個話題同身邊人傾談之餘，又可以增加佢哋團聚同結識新朋友嘅機會。

陳華新力作獻先師

總理陳華新（藝名陳培甡）則身體力行擔大旗演出劇中范蠡一角，佢話今次演出係佢師傅林錦堂其中一套戲寶，係佢師公粵劇紅伶林家聲親自教佢，而林家聲喺八月與世長辭，林錦堂亦喺兩年前逝世，故今次慈善演出，陳華新特別落力，話希望當係獻畀師傅同師公嘅一番心意。

出席晚會仲有副主席賴楚惠、總理莫蔡倩文同李慧芬等。賴楚惠話以前對粵劇冇乜興趣，但自從參加慈善活動睇得多，發現粵劇旋律同內容都幾得意，就開始同朋友一齊去欣賞，已成為消遣活動。