唔少政黨尋日都派人競投明年維園年宵乾貨攤檔，去到競投十八號攤檔時，鮮有出現兩個政黨同時競投。底價一萬三千元嘅攤檔，被白鴿黨同公文袋代表連番叫價，最終由白鴿黨以四萬六千元投得。負責競投嘅公文袋總幹事余冠威話，該黨上次年宵都係用同一攤檔，希望今次可「再續前緣」，佢承認白鴿黨有試圖協調，但佢拒絕。而白鴿黨代表黎敬瑋就話該黨前年都投過十八號檔，覺得十八號檔最好，所以決定同公文袋「拗手瓜」，好彩擊敗公文袋！

建制嫌成本高唔玩

失落心水攤檔嘅公文袋未放棄，轉戰四十二號攤檔，最後以全場最高價七萬五千元投得，較一般三萬多元嘅攤檔貴咗一倍。莫非暗示公文袋猴年運滯？但余冠威就死撐話競投價仍係該黨預算範圍，仲話該黨年宵成績一向唔錯，所以唔擔心回本問題。

至於一如往年競投六號攤檔嘅社民連就遇上「程咬金」，副主席吳文遠話投得五號攤檔嘅檔主突然意猶未盡，想一併競投六號攤檔，因而搶高競投價錢，令社民連要用五萬多元先順利投得六號攤檔，比預期成本高，要想辦法籌錢。同樣有參與競投嘅工黨就以三萬九千元投得一個攤檔，而支聯會就只用咗五萬九千元就投得沿用多年嘅一號同二號攤位，較上次九萬五千多元競投價為低。

今年嘅競投未見有建制派代表現身，建仔陳克勤話搞年宵成本太高，今年決定唔會用黨中央名義競投維園年宵，改由十八區支部決定係咪各自競投年宵攤檔。

第一手消息請下載on.cc東網iPhone/iPad/Android/Windows Phone Apps