政壇：抽秤開會出席率吳得掂火併大輝

立法會教育事務委員會主席林大輝頻頻向教育局局長「吳得掂」吳克儉「挑機」，隔空駁火！吳得掂尋日出席公開活動後，提到自己舊年係百分百出席教委會會議，點知傍晚即被大輝改以「出席議案數目的出席率」抽秤，大輝仲叫佢唔好用語言藝術誤導傳媒同公眾。吳梗係心有不甘，即透過新聞秘書話「事實勝於雄辯」，對「出席率」嘅計法被扭曲表示無奈。

其實大輝並非引用吳得掂出席會議嘅次數計算出席率，而係引用出席議案數目嚟計算出席率，數據指一四/一五年度舉行嘅十一次會議討論嘅三十五個議案中，吳嘅出席率只得五成七。大輝更不忘踩多兩腳，叫吳得掂要實事求是，唔好怠懶卸責。

無啦啦畀大輝「撳住打」，吳得掂即透過新聞秘書強調，若「出席會議次數的出席率」被誤解，甚或扭曲為「出席議案數目的出席率」，佢表示無奈。其實對比大輝同吳得掂嘅講法，估計係由於雙方計算嘅基數唔同，導致出席率有異，若按照大輝嘅講法，吳或因喺討論部分議案時未有在席，而未達到大輝所指嘅「百分之百」出席率。