之前都講過立法會餐廳即將重新招標，並成立招標委員會處理相關事宜。為咗一眾議員、職員同記者嘅「腹祉」，招標過程會包括試食環節。立法會行政管理委員會尋日開會，商討搵邊兩位議員加入招標小組，最終推舉議員陳家洛同「象哥」黃定光做「試食專員」。

黃定光(資料圖片)

據聞，會上有委員問可否分享試食後感，即係隨時要寫食評？行管會搵咗象哥同陳家洛做「試食專員」，除咗因為一個係泛民、一個係建制，或者同佢哋「識食」有關。象哥一向都算係識飲識食，佢代表嘅中華出入口商會每年秋天都會搞大閘蟹宴，難怪佢肚腩都有番咁上下。至於陳家洛，據知就有委員留意到佢經常去餐廳食晏，加上佢做大學副教授成日喺大學飯堂食平價飯，相信佢嘅口味貼近平民都未定。

第一手消息請下載on.cc東網iPhone/iPad/Android/Windows Phone Apps