話時話，立法會議員鍾樹根經常自創成語，例如「子烏虛有」、「明張目膽」，「樹根化」近嚟仲有蔓延嘅趨勢，唔止波及大專界同其黨友立法會議員譚耀宗，仲滲透至宣傳單張。繼樹根升呢做立法會議員時印卡片錯漏百出後，有網民又發現佢近日派發嘅傳單串錯自己英文名，喺左上方最當眼位置，將「Chris」寫成「Chirs」。對於「Chirs」呢個咁特別嘅名，網民都熱烈研究應該點發音先至好。

鍾樹根嘅宣傳單張，將自己英文名「Chris」寫成「Chirs」（箭嘴示）。（互聯網圖片）

樹根話呢批傳單有三、四千張，係由佢所屬政黨建仔統一交畀製作公司印刷，佢同事交畀製作公司前已檢查無誤，估計係製作公司出錯。對於今次「甩轆」，佢就建議建仔下次揀製作公司時揀多兩間。不過，派咗三、四千張都唔發覺自己個名出錯，佢都幾後知後覺喎，唔怪得有網友批評佢「是是但但、求求其其」喇。樹根本月將出戰東區區議會漁灣選區，同區候選人有報稱係小企業經營者嘅徐子見。

第一手消息請下載on.cc東網iPhone/iPad/Android/Windows Phone Apps