政壇：鄧國威曾做板間房宅男
早前離任嘅公務員事務局前局長鄧國威，尋日首次出席公開場合，喺美荷樓同學生分享個人成長故事同經歷。講起童年時住喺灣仔板間房，因為冇電視，每天晚飯後同家人傾偈就係佢嘅最大娛樂，因而同家人關係好親密，唔會出現四個人都掛住望電視或玩手機嘅情況。
鄧國威（中）退休後享受行山樂趣，並與年輕人分享個人經歷。
鄧國威憶述，讀書時性格比較內向，家中多客人來時，佢都唔想行出房應酬，但後來慢慢變得合群，又參加紅十字會等制服團體，仲笑言方便讀男校嘅佢順便識女仔添！講到三十七年政府工作生涯，佢勉勵年輕人打第一份工唔好怕失敗同蝕底，亦唔好寄望第一份係好工，當係攞經驗，年輕時應該擺多啲時間喺工作上。
至於退休生活，佢話依家好享受行山同食嘢，以及同年輕人分享經驗。問及公務員係咪愈嚟愈難做，佢話明白社會訴求愈來愈高，知政府一直有為同事提供更多支持、人手同輔導工作。
