創新及科技局（創科局）一波三折先獲通過撥款同成立，商務及經濟發展局局長Greg蘇錦樑尋日就急急腳交代，話創新科技署同政府資訊科技總監辦公室以後撥歸創科局，令商經局轄下只剩下七個部門同十一個對外經貿辦事處。其實阿Greg本身已少咗嘢做，但係佢講講吓，仲似想鋪路，推埋創意香港同知識產權署畀創科局，唔通臨近任期完結，就唔想做等收工？

阿Greg話商經局日後會專注推動經貿同發展旅遊業，轄下工商及旅遊科架構維持不變，通訊及科技科就會改名做通訊及創意產業科。商經局轄下仲有創意香港，大家都好關心會唔會同創科局嘅工作撞晒，阿Greg就話自己支持重疊，以往政府都有跨部門合作，對呢方面唔擔心喎，又話創意產業可涉及科技同非科技，如果創科局運作一段時間後，大家覺得知識產權署或創意產業應該歸納到新局，商經局會持開放態度。

不過，睇番舊年立法會審議創科局時，阿Greg被質疑係咪唔捨得創意香港同知識產權署，佢當時仲死撐話，創意產業涉及出版、設計等，未必同科研有關，至於知識產權包括商標、商業秘密等，覺得建議嘅分工係合適做法。依家咁快就轉軚，想推埋啲嘢畀創科局做，係咪唔怕被人話佢又懶又卸膊呢？

借麻省理工擋箭

其實睇番阿Greg任內搞創意，認真麻麻，尋日被問到點睇業界批評佢過往推動創科不力，佢仲厚面皮話，麻省理工學院嘅人都肯定香港發展創科嘅環境同成就，佢話香港唔好只睇自己嘅短處，應着眼機遇同優厚條件，成日用負面角度睇嘢會好唔開心。佢似乎想為自己辯護，力撐自己做咗嘢，但如果佢真係做得好，就唔使分創科出嚟畀人搞啦！

第一手消息請下載on.cc東網iPhone/iPad/Android/Windows Phone Apps