拉布政客扣人工 睇怕又煲無米粥

講真，港鐵三日一小跪，五日一大跪，市民早就見怪不怪咯，之不過呢位仁兄遲到被扣薪，除咗怨港鐵，睇怕都要慨嘆一句「同人唔同命，同遮唔同柄」囉，事關世上有一種筍工，遲到早退，返工遊魂，不務正業，人工照逗可也，而且仲係薪高糧準嗰隻。冇錯嘞，太一叮講緊嘅咪就係尊貴嘅立法會議員囉！

即係咁，叫得「垃圾會」，議員嘅表現早就有口皆悲。真係諗極都唔明，審計署對好多政府部門衡工量值，點解從來冇量過議員們每月穩袋九萬幾元，到底係咪物有所值呢。唔知係咪議員呢份工實在太呃秤，連早排喺財委會上剪布，令創科局順利過關嘅新任主席陳健波都有啲唔好意思，佢尋日批評議員拉布神憎鬼厭，要抗衡呢股歪風，可以考慮扣減有關議員薪酬及增加會議等。佢之前仲話，如果其他議員願意減薪，自己會帶頭減一半添。

冇錯嘞，一分耕耘，一分收穫，做人係咁，打工亦係咁。班政客求其掟吓嘢，爆吓粗，青筋暴現鬧吓人，成功博上鏡後，再跟手扮晒不情不願咁被「趕」出會場，他他條條又一Day。就算唔拉布、唔缺席老老實實坐喺度嘅，都一樣係魂遊太虛，唔係睇靚女相就係剪指甲，咁樣胡混度日居然繼續人工照逗，仲有天理嘅！再講吖，外國唔少議會對出席同投票率低嘅議員都有懲罰機制，好似德國咁，違規議員就要被罰款。政客開口埋口「國際標準」、「西方先進經驗」，冇理由唔跟啫，吓話？

話時話，有人建議拉布扣人工，無疑用心良苦，如果真係落實，納稅人肯定舉腳贊成。不過話又講番轉頭，你估班政客又會唔會咁順攤扣人工吖嗱。有道是，人心不足蛇吞象，班政客月支九萬元猶嫌不足，曾經要求人工同副局長看齊，甚至夠膽死要求將人工增加一倍，簡直飛擒大咬。咪畀人睇死，扣薪方案如果真係提上日程，拉布嘅肯定唔止嗰幾個激進派議員吖！

正如西諺話齋，火雞唔會投票過聖誕節，政棍亦唔會同自己荷包過唔去，市民唯一可以做嘅，睇怕只有用選票將無良政客掃入垃圾堆咯，叮！