城中鏡：鄭躬明生日P 扮蛋黃哥玩餐飽
富商鄭躬明上周六生日，喺屋企搞咗個生日派對，太太陳君宜就請來一眾好友，包括藝人朱慧敏同張達明等人嚟慶祝。近日鄭躬明經營嘅食肆，成功將卡通人物蛋黃哥炒到熱烘烘，喺生日當日，陳君宜特別請咗炮製蛋黃哥嘅點心師傅到會，上門為老公製造蛋黃哥壽包。見到蛋黃哥壽包咁特別，鄭躬明當然好開心喇，睇嚟應該好好味添，但貪玩嘅壽星公，竟然將壽包皮當帽戴上頭，扮成蛋黃哥嘅模樣，引得哄堂大笑。
鄭躬明（右）將壽包皮當帽戴上頭，扮成蛋黃哥嘅模樣，認真搞笑。旁為太太陳君宜。
另外，前日係周美鳳嘅生日，信佛多年嘅佢，今年生日就約埋藝人好友Jeana何佩瑜同Janice文詠珊一齊出海放生，周美鳳話：「上年放過一次，我哋想一年放兩次生，Jeana同Janice之前好想參與放生，叫我安排，所以我趁生日放生時叫埋佢哋，佢哋唔知嗰日係我生日，嚟到先知，於是一齊慶祝埋。」
