城中鏡：葉振南娶新抱 名人賀禮有心思
相信唔少人都曾經為送乜嘢禮物畀一對結婚新人而費煞思量，早前汕頭商會會長Stephen葉振南娶新抱，唔少政商界名人都有捧場，講起送禮，大家都覺得心意先係最重要。另有商界中人於特別日子送禮，都會花心思，似乎都係想收禮者會心微笑。
葉振南同太太（右一及二）喜見兒子葉家麟（右三）與張黎（左三）拉埋天窗，左一及二為新娘父母。
馬僑生（右）同太太覺得禮物清單呢個主意幾好。
馬鴻銘（右）不時親自下廚煮嘢畀太太蔡加敏品嘗。
朱鼎健早前買咗一束花去機場接太太機。
當日到賀嘅有「新小巴大王」馬僑生伉儷、「玩具大王」蔡志明女兒蔡加敏同老公馬鴻銘、懲教署署長邱子昭、「K金大王」胡楚南同一班潮州商會「家己冷」劉文文、胡炎松同張詩培等人，其中馬僑生伉儷話依家好多人喺結婚前，都會同朋友講定想要啲乜禮物，仲會列埋一個清單出嚟，方便又直接。
馬僑生支持禮物清單
對於早前網上有類似清單被指「獅子開大口」，馬僑生伉儷話未見過，覺得通常新婚朋友都係需要小型家電或擺設等，唔會太過分，認為整個禮物清單畀朋友認投，呢個主意唔錯，禮物唔會重複嘅同時，唔使驚對方唔鍾意。
講起婚宴以外嘅送禮心思，觀瀾湖集團主席兼行政總裁朱鼎健話早排女兒出外讀書，但撞正自己要公幹，趕唔切送機，因此派太太送女兒去外國，佢趁太太回程當日，就一早買咗一束花去機場接太太機，太太當然諗都冇諗過清晨五、六點一落機，就見到佢傻更更拎住紮花，喜出望外笑不停。
講番今次婚宴，Stephen話呢一日對佢意義重大，除咗係兒子葉家麟成家嘅大日子，當年今日仲係佢攞到現時代理啤酒品牌嘅日子，同年仲係兒子出世嘅重要時刻，佢又話希望快啲抱孫，佢個仔聽到，唔知有冇壓力呢？
