政壇：為仔女去到盡 港人RQ鬥低分

最新調查發現，在職港人平均RQ得63分（得分由10至100，高過75算高，低過60為低），仲有三成人直頭肥佬唔合格（即低過55），即係儲唔夠錢退休，平均退休時間要延遲11年。就咁嘅，熱愛工作、自己選擇做落去一回事，唔夠錢被迫做到76歲就……

點解港人RQ咁低？皆因一身兒女債！有87%受訪家長話，放喺子女興趣班嘅開支，仲多過自己退休儲蓄；有80%家長仲話要畀仔女最好，搞到忽略咗自己個人退休需要。

為子頻操心 珠珠明苦況

喺發布會做司儀嘅前主播「珠珠」趙海珠，講到家長苦況，佢都話自己好理解，事關佢亦係一子之母，兼仲有個囡囡嚟緊，佢平日淨係幫三歲囝囝簽學校通告，都已經用咗唔少時間，仲邊得閒諗退休！都未計有時見到靚靚水壺仔又買，鞋仔衫仔又買。不過咁，珠珠RQ都有64分(o架)！

廿四孝家長究竟可以為仔女去到幾盡？調查見到，喺入不敷支情況下，家長就算借錢，都唔會減少仔女課外活動。諗住將來退休靠番仔女照顧？諗吓好喇，事關有18%受訪90後原來好唔志在，竟然從來未睇過一眼自己個MPF戶口，分分鐘要你幫手儲埋佢第日退休嗰份。

想仔女生性？畀你參考吓：RQ最高嘅三個地區係港島南、中西區、油尖旺；最低RQ就係深水埗、新界北、屯門。