政壇：為《禁止酷刑公約》 卿姐獻第一次
立法會議員劉慧卿向來關注人權問題同國際事務，每逢聯合國就香港人權問題舉行公聽會，卿姐差不多次次都會自費飛去出席。尋日佢又召開記者會，宣布將於本周末聯同其他民間團體代表，前赴瑞士日內瓦開會，但強調今次係佢嘅第一次！原來佢係講緊第一次因應《禁止酷刑公約》去日內瓦。
卿姐二十多年嚟首次就酷刑公約前往日內瓦開會。
卿姐喺記者會上如數家珍咁話，過去二十幾年，自己曾經就《公民權利和政治權利國際公約》去過六次日內瓦，其他如《經社文權利公約》、《消除婦女歧視公約》、《兒童權利公約》等，佢都出席過有關嘅聯合國公聽會，唯獨係《酷刑公約》，就因為時間唔啱等種種理由，從未出席過。
對於香港嘅酷刑聲請機制疑似遭到濫用，有愈來愈多「假難民」藉聲稱喺祖國受到酷刑對待而來港打黑工，卿姐認為唔應該收緊機制，但認同港府審批過慢，欠缺效率，今次過到去日內瓦會作出反映。除咗酷刑聲請機制，佢亦會提到警方用催淚彈對付佔中示威者、七警事件及外傭受虐等問題。
