政壇：嫻姐又攪「局」 「文化」捲土來
隨着立法會財務委員會上周五通過創新及科技局相關撥款，勾起部分政界中人對於當年喺政府重組架構時，同時力爭成立文化局同體育運動專員嘅記憶，事有湊巧，工聯會立法會議員「嫻姐」陳婉嫻喺報章率先撰文，稱創科局撥款通過後，政府下一個目標係推出押後已久嘅文化局。
指民政局難兼顧文化工作
嫻姐開宗明義力撐，政府必須成立文化局，認為以現時民政局嘅態度兼顧文化工作，係處理唔到文化同文創業界範圍嘅事；對於會否因增設文化局再次掀起抗爭，佢認為最大問題係局長人選，一個熟悉文化藝術、受到各方認同嘅人，係重中之重。
至於同樣石沉大海嘅，係業界期待已久嘅體育專員位置，此事一直未有下文，與業界暫未有合適人選有關；如果退而求其次，當局委任政務官做體育專員，又會惹嚟外行人管內行人嘅批評。
講到底，增設文化局、體育專員喺三年前缺乏嘅條件，甚至係不確定嘅因素，至今仍然存在，依家重上議事日程，可能只不過係一廂情願。
如從客觀政治現實角度出發，劉江華上任民政事務局局長只有三個半月，公道咁睇，亦應該畀機會佢展現政治手腕，睇吓係咪能夠平衡各方持份者嘅訴求，加上現屆政府只餘下約一年半任期，立法會嘅最後一個立法年度，亦有好多具爭議嘅課題急待處理，為免再掀起新一波拉布戰，增設文化局等事宜，留待下屆政府先處理，似乎較為合乎現時實際情況。
