政壇：莫乃光幫拉布泛民補鑊

記得當日嘅財委會會議上，大部分泛民主派議員都投咗反對同棄權票，或者有意無意避席投票，唯獨係本身代表資訊科技界嘅公專聯議員Charles莫乃光，就點都留到尾，投下泛民唯一一張贊成票。佢尋日仲搵埋一批創新科技界人士舉行記者會，發表對創科局嘅期望，唔知係咪想為佢班泛民盟友發動嘅創科局拉布戰補鑊呢？

Charles等業界人士喺記者會上，要求創科局喺下周五正式成立後，盡快交代其發展藍圖同時間表，包括政府喺採購IT設備同服務時，多聘用本地公司、吸引更多大機構落戶香港、改革同創新技科相關嘅諮詢委員會等。

陳健波批選舉制度存問題

對於部分拉布議員對創科局通過懷恨在心，聲言要繼續拉布同阻撓新局運作，Charles就聲稱喺過去嘅討論中，冇一個黨派否定要做好創科局，相信有關爭拗已告一段落喎。最好就係咁喇，否則當佢班泛民盟友再次針對創科局玩嘢時，佢又會變成兩面不是人，影響連任機會。

而成功剪布嘅財委會主席陳健波就繼續怒插泛民拉布，愈鬧愈過火。佢尋日喺電台狠批現時立會選舉制度有問題，地方直選候選人攞得兩、三萬票都有機會當選，變相助長少數激進勢力進入議會，肆意拉布搗亂。話說回來，陳健波嚟自嘅保險界，成個功能界別只得百多二百名選民，佢首次當選時只攞得幾十票，有冇資格批評啲手執兩、三萬票嘅同事呢？真係好成疑問。