深水埗：青山道違泊嚴重 阻礙交通
「日日返工放工都見到好多車泊滿兩邊，貨車、私家車霸晒啲行車線，搞到成日塞車，每逢星期六就更加嚴重，有時連巴士都埋唔到站，我哋要走出馬路上車，都幾危險。」在深水埗工作的陳先生指，青山道由九江街至昌華街一帶均有嚴重違泊問題，阻礙交通之餘亦對行人構成危險。
青山道一帶有嚴重違泊問題，車輛霸佔兩邊行車線。
警方發言人證實，知悉上址一帶路段的違泊情況，過去一年亦在上址共接獲八百一十六宗相關投訴，並發出一千九百二十九張告票檢控違泊車輛。發言人指，根據法例任何人不得停放汽車致對道路造成障礙，強調會繼續留意上址並採取適當行動，以維持交通暢順及道路安全。
