有團體做過調查，香港退休成本大概四百萬元左右。問題嚟嘞：大多數基層打工仔搵朝唔得晚，儲夠四百萬元喎，除非中六合彩嘅啫。所以話，養老除咗靠個人，政府同社會同樣有責，唔怪之得全民退保呼聲咁高喇。

呢，港府年底就退休保障推出公眾諮詢，來自十六間大專院校嘅六十多名學者日前搶先提出「全民養老金」方案，建議所有六十五歲或以上長者，毋須資產或入息審查就可每月領取三千五百元保障金，只要政府將種子基金加碼至一千億元，加上盈利超過一千萬元嘅企業額外繳交百分之一點九利得稅，以及勞資雙方各自提供百分之二點五嘅強積金供款，就足夠應付去到二○六四年嘅開支。學者又話，如果當局拒絕將方案納入公眾諮詢範圍，會杯葛整個諮詢喎。

咁港府又點回應呢？勞工及福利局局長張建宗係咁講嘅，「全民養老金」值得討論，但時間所限，無法納入諮詢，但今次諮詢開放坦誠，希望各方保持理性持平咁話。咁即係點？即係拒絕學者方案咯。查實港府早有預設立場，官方諮詢文件以「不論貧富」同埋「有經濟需要」，取代全民及非全民退保，大玩文字遊戲誤導公眾，令人以為前者亂派錢，後者公帑用得其所。有高官甚至出埋口術，強調唔少長者「低收入、高資產」，根本唔使幫，擺明諗定點樣卸膊。

其實明眼人都睇得出，呢啲只不過係推卸安老責任嘅藉口啫。冇錯，部分長者係就係有自置資產，但呢啲係佢哋嘅棺材本，唔通真係要等到佢哋淪為無產階級，露宿街頭，政府至肯幫咩。再講吖，長者勞碌半生貢獻社會，老有所養唔單止係最卑微嘅願望，更加係政府不可推卸嘅責任。

真係愈講愈火滾，特衰政府一向視長者為包袱，長者資助宿位長期供不應求，港府唔諗辦法增加供應，反而一味諗縮數，唔係提倡居家安老，就係鼓勵北上養老，旨意佢哋承擔安老責任，同與虎謀皮無乜分別嘅咋。

係嘞，大家仲記唔記得，幾年前港府想引入生果金資產審查，搞到天怒人怨，前特首曾爵士喺立法會畀議員掟蕉侍候嘅同時，一群公公婆婆用鞋底狠打佢嘅小人頭，結果政府跪低收場。家陣講全民退保，港產官僚又試圖推三阻四，仲企圖引入資產審查制度，唔通真係「唔見拖鞋唔流淚」？