「四洲太子女」Kennis戴凱欣同男友Justin前晚出席一個酒莊晚宴，富商趙世曾女兒趙式芝漏口風向記者話Justin係Kennis嘅未婚夫。當記者恭喜Kennis時，佢笑言：「未恭喜得住，未計劃。」問到Justin有冇計劃？佢回應：「冇，慢慢嚟啦。」Kennis坦言轉眼已拍拖半年，非常享受二人世界。佢話：「啱啱去咗東京旅行一星期，食咗好多嘢。因為我一年去幾次日本，好熟，佢就未去過，所以我做導遊帶佢餐餐食唔同嘢。未計劃下次去邊，可能台灣，近近哋。因為我哋都鍾意食嘢，有個伴一齊食好開心。」咁有冇肥咗好多？佢坦言有。問到Justin係咪無論Kennis肥定瘦都喜歡？佢笑言：「冇所謂。」

戴凱欣（左）笑言同男友未有結婚計劃。

趙式芝（右）話身邊楊如芯酒量好過自己。

趙式芝就透露，酒莊會捐款到佢嘅慈善基金。佢話喜歡飲法國嘅紅酒、澳洲或新西蘭嘅白酒。問到佢嘅酒量如何？佢話：「一般般啦，都係保持兩隻腳返屋企嘅狀態。」問到伴侶楊如芯嘅酒量如何時，佢笑言：「佢酒量其實好過我，不過啲人成日覺得佢差啲。因為喺我飲一杯嗰陣，佢已經飲咗三杯，可能佢太口渴。其實佢依家好乖，少飲咗好多。佢依家鍾意做運動，朝早起身晨運。」

咁有冇陪做運動？趙式芝話：「我要返工。佢係享受生活型。佢以前係網球冠軍，依家係高爾夫球熱愛者。我周六、日會打，一個星期有一日同佢同媽咪打波。」

第一手消息請下載on.cc東網iPhone/iPad/Android/Windows Phone Apps