城中鏡：文青變貴婦
城中一班政商界名人尋日均盛裝打扮，出席沙田馬場嘅莎莎婦女銀袋日。場內見到愛沙尼亞駐港名譽領事林建康同佢太太Lianne林黃寧艷。講起第一次穿着隆重嘅回憶，一向打扮優雅大方嘅Lianne就話佢以前係名副其實「書蟲」一名，冇乜打扮，仲要有成千度深嘅大近視，只係後來做咗激光矯視先唔使再戴眼鏡咋！
林建康（右）同太太林黃寧艷出席活動，穿着皆優雅得體。
蔡李惠莉（左起）、立法會議員蔣麗芸同顏吳餘英大談穿衣之道。
郭少明（左）同太太郭羅桂珍邀得一大班好友出席莎莎婦女銀袋日。
Lianne坦言學生時代最愛睇書，衣着方面反而好隨意，最鍾意就係牛仔褲襯冷衫，夠晒方便同舒適，就算係節日派對同舞會都唔會好似依家咁講究衣着，係後來出社會工作，佢先開始注重打扮。不過Lianne身形高挑，相信無論當年嘅文青定依家嘅高貴造型都難唔到佢。
場內嘉賓眾多，包括一向造型極花心思嘅九巴後人雷禮權同太太利蘊珍、「玩具大王」蔡志明太太蔡李惠莉同教育局前局長「孫公」孫明揚同太太鍾小芬等，位位都悉心打扮同配合主題帶番頂靚帽。主人家莎莎國際主席郭少明同太太郭羅桂珍就全程滿場飛招呼賓客。
顏吳餘英：畢業袍最隆重
香港中華廠商聯合會前副會長顏吳餘英話，以前唔係人人有機會讀大學，所以對佢嚟講，人生最隆重其事嘅一次並唔係着乜嘢晚裝，反而係佢之前讀番書、終於有機會着畢業袍嗰一刻。而打扮走型格路線嘅鍾小芬就笑言，平日襯衫時孫公最鍾意話「着咩都冇所謂」、「最緊要快」，但佢就一於好少理，堅持襯好先出街，仲會幫老公揀埋衫，好似佢就幫孫公喺西裝入面襯咗件粉藍色針織衫。至於蔡李惠莉就偏好紫色同紅色晚裝，覺得着起上嚟人都精神啲，唔似灰色咁會着到心情都灰埋咁話。
