政壇：飛臨半島 王敏德締商機
型男王敏德自家品牌前晚開幕，佢透露喺銅鑼灣嘅店舖做咗半年就結業，問到係咪蝕咗好多錢？佢話：「梗係，不過唔止我，成個市場都係，蝕咗幾多錢就唔好講，我依家對呢間舖好有信心，希望可以做到一個中國人嘅牌子，都投資咗七位數字㗎！」佢透露由於其駕駛嘅直升機成日喺半島酒店降落，因此就問佢有冇興趣喺呢度開店，於是促成今次合作。佢話唔會自己做生招牌，反而會搵藝人做代言人，想要運動型，仲計劃去北京開分店添！
王敏德（中）新店開張，太太（右二）偕子女撐場。
名模老婆馬詩慧同仔女一齊嚟撐場，佢仲以低胸皮裙現身添！問到老公之前蝕咗咁多錢，仲支持佢開業嗎？佢深情咁話：「佢有個夢想係揸直升機，已經實現咗，呢個係佢第二個夢想，雖然之前有少少觸礁，但都係一種經驗！」
追問馬詩慧有乜嘢夢想想實現時，佢話：「講太多就真係發夢，邊有咁多錢？惟有放棄一啲夢想去實現佢哋嘅。」咁抱孫係咪佢嘅夢想？佢就話：「呢個唔係夢想，係好快會實現嘅！其實我個人好簡單，野心唔係好大，健康開心就得！」
