政壇：肥媽枉教葉劉 依然無飯主婦
由肥媽Maria Cordero主持嘅飲食節目深入民心。唔講唔知，原來肥媽除咗喺演藝界地位十足，同唔少政治人物都好有淵源，佢尋日就去到新民黨一個活動撐場。新民黨主席葉劉淑儀就自爆，同肥媽十幾年前喺飲食節目結緣，肥媽當年仲教佢煎（魚倉）魚。雖然簡單易做，但就因為平日太忙，完全無時間學以致用，搞到依家仲係「無飯主婦」。
葉劉淑儀（左）自爆肥媽Maria Cordero曾教佢煎（魚倉）魚。
葉劉雖然有肥媽過兩招，但因為平日太忙，所以主要都係靠囡囡煮畀佢食。葉劉仲透露，囡囡嘅拿手好菜有蘑菇湯、千層麵同中式扣肉。
同葉劉相識十幾年嘅肥媽就大讚葉劉係政界人才，葉劉亦都話肥媽係靠自己向上流嘅好例子。雖然大家互笠高帽，但問到葉劉會唔會邀肥媽入黨，葉劉就話藝人身份始終唔太方便喎。
