政壇：搞搞政：工聯會電郵戰 炸爆張建宗
勞工政策一向係政府施政中嘅難題，之前標準工時委員會入面嘅六名勞方代表揚言，如果政府年底都唔就標準工時方案諮詢公眾，就集體退出抗議。政府都未來得及反應，勞方嘅行動已一步步殺埋嚟。工聯會尋日就擺街站，呼籲市民幫手爭取勞工假同公眾假劃一，仲疑似抄泛民橋，發起「一人一電郵」行動，叫市民將有關勞資問題嘅意見電郵畀勞工及福利局局長張建宗，實行「炸爆」佢個電郵收件匣咁話！
工聯會立法會議員陳婉嫻曾多次就勞工問題大膽同政府「駁火」，該會尋日仲發起街頭運動，拎住幾個代表假期嘅相框去旺角同市民合照，呼籲市民幫手爭取勞工假同公眾假劃一，以免打工仔喺假期仲要返工，影響家庭和諧。佢哋另一名議員麥美娟話，該會會繼續用唔同方式爭取政府關注勞工議題。今日特首CY梁振英會就施政報告同佢哋見面，到時佢哋都會向CY追數。佢哋亦會擺街站同搞簽名行動，希望市民明白勞工權益對打工仔嘅影響。
未回應有進一步行動
講到三年嚟乜嘢都爭取唔到，麥美娟話其實佢哋十月中已開始升級行動，就係呼籲打工仔將想法電郵畀張建宗，等政府知道市民對勞工問題幾着急。問到佢仲有冇進一步嘅抗爭行動，佢就笑住反問：「唔通你想我哋打交咩？」
有勞工界人士指出，現時勞資問題主要有取消強積金對沖、標準工時立法、勞工假同公眾假劃一三條戰線。勞工界希望CY任內至少可完成兩項。其中勞工假同公眾假劃一係相對較少爭議同容易處理，所以會由呢度入手，之後就係就標準工時立法。
工聯會依家已開始用電郵逼張建宗表態，估計之後嘅抗爭力度只會有加冇減。工會同政府角力嘅好戲相信好快上演。
